大家睇完 “煙之幻影” 都會問 “How can you do that?” 會唔會好複雜?  使唔使好似 Studio 咁大陣象? 使唔使要好貴器材?

當我在網上見過一啲影煙的作品時 , 我都有同樣的問題? 

只覺得真的很迷幻 , 很神秘 , 很美 , 自己亦好希望能學吓點去影 , 明知影實物巳經唔容易 , 煙呢啲咁虛無飄緲的東西就一定更難。坊間亦沒有教影特別效果的書 , 這方面的資料着實不多 , 真係老鼠拉龜無從入手。上星期無意中在網上找到一些資料 , 原來俾我想像中容易及簡單 , 而手頭上架生亦齊 , 於是膽粗粗照版煮碗在家試玩……….

設備: 

一塊黑色布 , 腳架 , 相機 , 普通鏡頭 (不須使用大光圈鏡) , Shuttle繩 , 閃光燈 , LED 電筒 , 反光板 , 拜神用筷子般粗的香一支。

架生執齊 , 這晚等家人用完就在浴室 Set Up 小型影棚。大家一定會奇怪問點解要在浴室?  無他 – 貪佢熄晒燈夠黑 , 空間足夠 , 少氣流 (只有抽氣扇) , 浴室門有疏氣可以散氣 (切記不要在密閉空間中去拍攝 , 因為好易會中二氧化碳毒) , 而且浴室有水以便不時之須 , 關上門啲煙唔使攻到屋企人。

 

第一次 Setting 如上圖:

·            全黑布一塊做背景。

·            支香放在櫈上即紅色位置。

·            LED 電筒以小腳支將啲煙照光以便對焦。

·            我用 Nikon 相機的 Creative Lighting System , 以紅外線操控 , 機頂閃光燈做 Master , 閃光燈用 Manual Mode但Output Set 去零 , 即只放紅外線 Signal 不作正面打光。

·            另一支閃光燈 Set 做 Slave , 放在如圖的位置 , 同樣 Set 做 Manual Mode  對準煙的方向。 (閃光燈的位置 , Output 1/1 – 1/16 之間要不斷試)

·            若無上述兩樣可用一條延長線作離機閃光亦可。

·            白色反光板或 Foam Board一塊作補光 , 同 Slave 閃光燈光源成 45度角 , 切記避免將閃光射入鏡頭及黑色佈景布上。

·            相機 Set 在腳架上並用 Shutter 繩連接操控 , (喜歡的話亦可用 Cable 連接電腦 , 一影就自動過相在電腦中即時睇效果) 。

·            相機快門先試 1/125 。

·            相機用全手動 (M ) Mode , 光圈用盡, 用中央點測光 , 用支香做對焦點 , ISO 試 800 – 1000。

·            關上抽氣扇令室內氣流靜止。

·            Set 好一切就點香熄燈 …….. 開壇作法。

天時暑熱 , 在一個黑暗狹少 , 充滿着”煙” 的空間內拍攝 , 加上要試不同Setting , 真是焗桑拿般汗濕重衫 , 一點不好受。而且我每一次移動都會影響室內氣流 , 啲煙就會散晒 , 要再等一等才有得影 , 真係非想像中的容易……影幾分鐘就要出外唞唞氣 , 否則屋企人唔知真係以為 AM 有吔諗唔開燒碳自殺 ……..

第一次玩咗成個鐘影過百張相 , 基本上可說全軍覆沒 , 問題是跟本 Light Up 唔到啲煙 , 而且啲光反晒落在 Background度 , 心諗無理由為咗咁去買支射燈?  加上對焦好難 , 第一次試驗可說是失敗 , Setting 本身一定出咗問題 , 唯有第二天再繼續嘗試………

第二晚基於上次的 Setting 作改動 : 如上圖:

·            將背景塊布推後 , 加大香同背景距離。

·            ISO 調低到 250 避免太多雜訊。

·            鏡頭光圈 5.6 – 7.1 取較寬的景深。

·            相機快門起碼要 1/250 或以上才能將煙的形態凝固。

·            主機閃燈 Setting 變 , 但 Slave 閃光燈改用 TTL。

·            將支電筒同閃光燈移放同位置 , 最終將兩樣一左一右放近支香 , 拉近距離對住啲煙 , 效果最好。

掌握了 , 一切就變得容易 , 真係坐定定响度睇住啲煙變化揀啱先影 , 鐘意就離遠對住啲煙吹口氣 , 吹亂啲煙又影。

今次成攻率可達 95% 影完揀了一些最好的 , 就進入 Photoshop 後製。

1.     將相片裁切。

2.     Image影 像 —-> Adjustments 調整 —-> Hue Saturation 色相 / 飽和度在內調整色相 / 飽和度就可以變出不同顏色。

3.     做完裁切後 ,  按 Ctrl + J (增加一個圖層) , 再按 Ctrl + I 將相片轉做負片效果 , 再重覆做 (2) 改色相 / 飽和 。

影像重叠效果:

1.     揀選相片後 , Layer 圖層 —-> Duplicate Layer 複製圖層。

2.    Edit 編輯 —->  Transform 變形 —-> Flip Horizontal 水平反轉 (將複製圖層反轉)。

3.   Image   影像 —->  Canvas Size 版面呎吋將內裏寬度及高度的呎吋加大一倍 , 將 Anchor 錨點偏向一邊。

4.     用移動工具將圖層移動與原圖接合就變成一個 Mirror效果。

5.     之後將相片裁切 , 儲存做 Jpeg格式。

6.     喜歡的可重新做變色效果。

 

這段影片大至說明了整個過程 。

 

我影相真係無跟師傅學過或去上堂 , 全部都係自學加盲摸摸靠撞 , 同參考別人的作品偷師而來 , 用最基本的東西去試、去玩、去 Enjoy。

老實講我都好想有啲高手師兄指點吓我。