元宵節中國的大節日 , 中國及台灣各地都有不同慶祝活動 , 而潮州的豐順就以舞火龍出名 , 很多沙龍靚相都以這為題材。 這個元宵碰啱週末唔使攞假於是就跟攝影團去影火龍。 這絕對是一次的” 很激” 及 ”難忘” 的攝影體驗 ! 當我在FB 放相後很多朋友都私下問我攝影詳情及一些細節 , 有見及此我就將我今次的個人經驗及所見所聞作個分享。
我以前在大坑都試過多次影火龍 , 但雙對豐順火龍來說大坑的火龍是個小兒科。根據攝影團的資料 , 一般的拍攝方法只有兩種 , 兩者只可揀其一!
A) 帶備腳架長鏡 , 可用了高腳架、膠櫈、高梯 , 站在山丘上離遠影
B) 帶備保護裝備 , 用Wide鏡落場影。
A) 方法好處是可以居高臨下影到全條火龍而且較安全 , 弊處是全程被人群困住攝影角度被局限 , 若 Location 唔好條龍唔過來就無晒符。
B) 方法落場跑雙對是較危險的 , 但好處是攝影角度變化大 , 可以近距離拍到臨場感及人物。
我喜歡拍臨場感及人物所以選擇了 B 方法。之後就要諗保護裝備的問題 : 原本諗住用單車頭盔 , 但單車頭盔穿隆防唔到煙火 , 走去五金鋪花 $35 買了個工業安全頭盔 , 再加 $25 買個 3M 眼罩就算。 至於口罩我怕焗所以沒有準備, 只打算若需要用條魔術領巾拉起就當口罩。 衣著方面嚴格來說一些不易燃物料如皮、棉、羊毛、牛仔布會最好 , 但我見舞龍那些都是赤膊上陣無須太過 , 細想之下只準備件唔怕燒穿的舊 Jacket 就算 , 我裝備算最是 Basic 的。 有些團友選用電單車頭盔 , 因電單車頭盔有個透明擋風及可以保護到耳仔 , 這比工業安全頭盔有更強保謢 , 弊處是價錢較貴及大件。
若果無準備任何保護裝備、膠櫈或高梯 , 可以要求旅遊團到豐順市內的當地五金鋪購買 。 電單車頭盔都只係三幾十人仔有交貿 , 六級鋁梯都係一百人仔平過上淘寶。 可以的話買張膠櫈仔也好 , 一來咁長時間等侯可以用來坐 , 到影相時亦可企高用 , 一物二用。
我們大約 5pm 到達 , 舞火龍的塲地在一條村內 , 村內有一個約兩、三個足球場咁大的空地 , 而空地對上兩邊有一個兩三層樓咁高的小山丘 , 山勢很平而且地方都算幾大。
舞火龍在晚上 8pm 開始 , 我哋 5pm 已見場內山丘上已有一排人 Set 好腳架霸位等待。
在場外另一邊有幾坐三層村屋 , 而所有天台上全部已放滿腳架及高梯預留位置 , 而這些位聽說是買位預留的 , 角度好與否就見人見智。
場內有大批警員維持秩序又有一輛消防車在戒備 , 水馬放在斜坡邊位 , 大會亦有不時廣播 , 準傋功夫做到足。
現場所見原來除了 A) , B) 方法外 , 還有其他影法:
C) 航拍 – 我在場起碼見到四、五架航拍機 , 我對航拍沒認識所以難作評論 , 但現場咁多人若航拍機萬一失靈下墮 , 那會是件頗危險的事。
D) 手機 – 這個唔使講 , 場內九成人都用手機拍攝及錄影 , 而他們永遠企在你面前擋住你。
E) 高梯 – 我見過有人抬8 – 9尺木梯進場 , 但大會一見到有人用高梯就立即揾人掃走 ,現場觀察一般 5 – 6級梯就好足夠 , 一來無咁揚 , 二來亦較為安全穩陣 , 三來你太企得太高阻住後邊又一定俾人鬧死。掉轉頭來你霸了個好位仲等了幾小時 , 但臨開場俾前突然有人用高梯擋住你 , 而你身邊亦企滿晒人無得換位 , 你心情會如何? 真係交都有得打!
F) 高棍 – 這是我最討厭的東西 , 它們永遠在龍頭位置 , 老實講我都唔知佢影到乜!
G) Action Cam – 我覺得這個可以考慮 , Set一個在頭盔或胸口作錄影記錄 , 但影到乜又或者有無用另計。不過在咁兵荒馬亂中俾人扒咗都無人知。
當地導遊警告場內有扒手趁混亂揾食 , 所以我哋啲銀包、電話都留在車上 , 而自己只帶一機、一鏡、一支水、少少乾糧及保護裝備就去。
如是者由 5pm 等到日落又等到月出 , 幾難得等到 8pm 真係等到發呆!
這個元宵碰巧在週末 , 除了內地人外亦有很多來自外省及港澳攝影人 , 越夜越多人整個山頭都密質質企滿晒人插針不下 , 真的非常誇張 , 而場內亦有不少群眾 , 我粗略估計在場有幾萬人 , 大會話預計有十五萬人。
黃昏開始埸外就輪流放煙花 , 氣氛熱鬧 , 當地人就像行年宵市一樣一家扶老攜幼又或者情侶食完飯出來看火龍襯熱鬧。
我哋落場果班 7pm 左右就上晒裝備進場。
場內真係乜裝備都有 , 有著橙色消防衫的 , 地盤工友組 , 電單車頭盔黨 , 飛虎頭套幫 , 甚至銀色走火用防煙面罩都有人用。另一方面有些群眾像去老蘭般戴晒閃光頭箍、鴨咀帽 , 手拿閃光棒的……….. 總之就像嘉年華會般各式其式。
據領隊打探得知當一晚共有四條龍 , 每條龍出場先有一些插滿煙花的魚、蝦、蟹、雞開路。
Programe Run Down 是首光場內有村民用滕做的火把驅散人群。
隨後是魚、蝦、蟹、雞開路 , 條火龍這時著晒 LED 燈隨魚蝦繞場三、四週。
之後村民會燃點多支包滿炮杖的長竹在場內橫掃驅散人群為舞龍開路。
這些炮丈村民真係唔同你客氣 , 他們永遠衝向人群 , 見到佢真係走夾唔透 , 有幾次走得慢個炮丈就在我頭頂及面前爆非常驚險。
爆完炮丈就嚟火龍 , 火龍一點火就狂噴煙花 , 穿雲箭在空中嘶叫 , 離遠睇就好似恐怖襲擊咁! 條火龍在入群中穿插 , 龍身上的煙花四射 , 氣氛熱血!
此時現場氣氛高漲到頂點 , 落場跑的攝影人見到咁場面真係話之你 , 個個衝晒埋去搏命影。
每條火龍由起火到熄滅都起碼兜到兩三個圈 , 而一晚有四條龍 , 咁就有十幾次會影 , 所以根本唔使心急。
由於未摸清形勢 , 我最初在遊行路線中某些位置佈防等條龍經過時才衝落去影 , 條龍離開了就回防看看相片如何再調節 Setting , 等條龍再回來時又再衝殺 , 如是者一兩次就大概知道用乜 Setting 最好。
除了影龍頭外其實龍身、龍尾加埋那些魚蝦都好多嘢影 , 只要你唔怕煙花火舌就可以。
通常第一條龍啲人會避忌一些 , 但發覺那些煙花火舌彈上身都無乜傷害個膽就更大 , 所以啲人會越影越近 , 有時甚至阻住條火龍去路。
有幾次我幾乎被人群撞倒 , 我被迫退到水馬陣邊 , 而水馬陣在斜坡邊沿 , 當時一個水馬俾人踩爛而內裡的水湧出 , 水加泥就好跣 , 我一隻腳叉咗落斜坡 , 好彩另一隻腳仲企得穩及無再有人壓過來 , 勉強撐返起身無事又再衝過。
這種兵荒馬亂像戰地記者般的拍法 , 拍攝機會往往一瞬即過 , 無可能俾你企定定搞一輪 setting才影 , 所以要人機合一及臨場執生。
由於每個場景光暗不同 , 好多機會瞬間即過根本無時間俾你調教 Setting , 所以我用最簡單的方法去做 : 光圈開盡 F2.8 , 快門維持在 1/125s – 1/160s , WB 用太陽 , AF-C單點追焦 , 全部以 Raw 拍攝 , 我以這些作為基楚 , 而ISO 就因應光暗而變由80-6400。 其實我可以 Set ISO 做 Auto 讓相機自由選揀但弊處是相機不知你想要什麼 , 有機會 over , 所以我寧願自己操控。
LED 龍巡遊 ISO 2500-3200 ,
條龍爆火時非常光所以用 ISO 80,
AM 的品味人生 