上次海鮮宴後學到不少海鮮的知識 , 某天行過街市明明那是角螺但漁佬話係嚮螺 , 買幾十蚊一斤 , 心想唔識分真係俾人劏咗都唔知。

有網友托我問海鮮專家兩條問題 , 我覺得這類魚類知識真的很有參巧價值。於是將問題及答案原汁原味奉上 , 供大家一個參巧：

1. 聽過一芒、二鯧、三鮫郎，不過亦有另一個講法係一鯧、二芒、三鮫郎，芒魚暫時問過，無人講得清楚係乜野魚，但內地漁民就話係罔魚，亦即係軍曹魚，至於馬鮫郎，聽過的講法都係指馬鮫魚而唔係馬友，而聽過另一版本話，呢個排名係指做咸魚最好食的三種魚，可唔可以問下你位專家朋友，邊個講法先啱呢?

2. 仲有一個問題，牛屎立同黑立點分呢，因為兩種價錢同食味都有差別!

  ***********************************************************

專家已再向漁民朋友求證，一芒、二倉、三鮫郎的排位正確，而馬鮫郎是馬友！至於是否做咸魚的排位，這個可能性很低，因從未聽過或見過用倉魚來做咸魚。

至於【牛屎立(即是黑立，又叫白咀唇)】與【黑沙立】較明顯的分別如下：

牛屎立：生猛時成身黑色，凸顯其白色又肥又厚的魚咀，所以釣魚佬又會叫黑立做白咀唇！

黑立隨了較黑外，其身型比起黑沙立較厚和圓，魚鱗亦較大塊，至於食味，牛屎立好食過黑沙立多多聲，而我地的立魚好食指數首三位的排行榜順序為白立、牛屎才到黃腳立。

當然季節會影響每種立魚的肉質和食味。就以黃腳立為例，這一、兩個月的黃腳立由於準備散春，肉質多數變得鞋又無魚味，漁民稱這段時候的黃腳立為【霜降立】，可避免買來食用，不過用來做鹽鮮倒還可以呢！