經過多個月的繁重工作自己覺身心俱疲個腦實晒表現亦有點跌 Watt , 身體話我知係時候要休息一吓 。心想格格月尾就會放完漫長暑假回英國繼續升學 , 反正今年未曾與家人外遊, 就順勢放一星期大假一家人出去差吓電開心吓 。

對於旅遊目的地AM 嫂與格格都十分揀擇 ,AM 嫂腸胃唔好體能麻麻唔係好捱得 太辛苦上山下海的一概免問 。 格格對於祖國的壯濶山河沒太大興趣 , 陽光海灘的渡假模式會兼悶 …………………在眾多外遊目的地中很多都攞唔到三分二的支持票除了日本之外 , 我當然順應民意就選了日本的北海道 。

大家可能會問我去北海道點解唔自駕遊而 Joint “吃瞓鴨仔團” ?  原因好簡單因為自己 “唔想諗唔想煩”。  無可否認自駕遊彈性好大可以去到很多好地方 , 但苦於自己要一早揾資料訂酒店租車安排行程 (AM 嫂及格格不擅長於這類尋幽探秘工作) , 自己亦無時間而假期要到九月頭才能 Confirm , 若是搞自駕遊真係唔夠時間。  現在的旅行團都照顧到很多不同須要 , 有風景、有温泉、有樂園、有購物 , 很行程唔會太趕 , 加上暑假過後日本踏入淡季而且初秋天氣舒服 , 釣魚台事件少了强國人, 團費回落到合理水平 , 反正自駕游都是去那幾處地方 , 倒不如乾手淨腳唔使煩。

但凡鴨仔團所去的地方 , 吃的住的都是指定動作, 大家看圖全都是熟口熟面的景點 – 扎幌 , 小樽運河 , 積丹餵海鷗 , 洞爺湖温泉及煙花 , 登別水族館企鵝巡遊 , 地獄谷 , 富良野薰衣草 , 美瑛花田 ……….. 這些地方好多人都去過所以不作細表。

今次只是輕裝上陣只帶一部 D300加支18-200天涯鏡作主力 , 影的大部份都是到此一遊的家庭相非常隨意 , 唔想搞咁多大龍鳳 , 始終家庭旅遊與專題攝影心態上是有很大分別的 , 大家當是旅遊相看算了。

第一站是小樽運河 , 到達的時間已是黃昏而且下着細雨 , 只逗留很短時間拍攝少許 Magic Hour。

第二天早上逛逛小樽歐陸情懷街 , 遊客必到的音樂城 ,
玻璃屋 …………..

試吓美味無比的雪糕……..

下午到這個積丹半島 ……….

 坐吓觀光船 , 透過玻璃船底睇吓無乜料到的海底生態吹吓風餵吓海鷗。拍攝這些近距離海鷗啄食相片對我來說無乜難度 , 但有好多團友都影唔到 , 原因是海鷗唔肯飛過來。

 

 

 其實要訣很簡單 , 海鷗會取易不取難 , 有些人會怕海鷗啄親手而將麵包一條條拋落海 , 海鷗自然樂意不勞而獲 。最好先等其他人將麵包皮拋晒落海之後無晒貨你才開始餵 , 一手擰住唔好郁咁啲海鷗就會飛近及追住來啄食你手上的麵包 , 這樣你才有機會捕捉到這類近距離影像。

餵完海鷗就去睇吓啲無乜特別的海岸線 , 之後就去洞爺湖温泉區入住酒店。 一家三口漫步於平靜的洞爺湖邊說不出寫意舒服

食完晚飯洞爺湖有小型的煙花 Show , 影煙花對我亦無難度 , 手痕又玩吓煙花變奏 ………..