Upgrade 的誘惑

e1

 事先聲名這不是一篇相機測試或評論 , 只是自說自話 , 純粹是個人對新相機的想法而已 , 不喜勿插!

最近自己班圈中影友最熱門的話題離不開 Nikon 新旗艦及中級機 – D4, D800, D800E 這三部機的規格真的十分強勁觸目 , 而且三部相機定位清晰 , D4 旗艦主打運動及記者 , D800  Studio ,  Wedding 及人像 , D800E 可以作風景攝影用。  D800 一出大家都跌晒眼鏡 Nikon 竟然將 36MP 的規格放在 D700 的後繼機 D800 而非旗艦機 D4 !!   D800 功能直迫上代旗艦機 D3x ,但價錢只是 D3x 的一半 , 這種將頂級功能下放的經營手法真是用家之福氣。  其實 D700, D3s, D3x 都已十分理想但新機則更為吸引 , 加上十分進取的訂價 , 以同等規格的標準來說真的無乜對手。

Nikon 這一着令到原本一班支持者都心郁郁考慮升級 , 亦令競爭對手的擁護者有了很大的轉會誘因 , 起碼我身邊有多位用 5DII 的朋友都係咁諗 , 而由 DX 升呢到 FX 都大有人在。 Nikon 今次將中幅的規格下放到民用市場以市場戰略來說真的十分厲害及殺食 , 而大家亦覺得這幾年的等待十分值得。

雖然對於新機的強大性能 , 大家可能有不同意見 , 老實講就算舊機性能都好強若是單純影相的話 , 若部機唔壞又真係可以玩三五年。 新機性能可說是錦上添花 , 實際拍攝上可能未必用得盡。 其實有多少人用得盡部機?  (這個根本不重要 , 皆因人追求卓越 , 貪新忘舊是劣根性 , 永遠都係新好過舊。) 而且由上一代到現在差不多有三年之久 , 亦是時候有些少改動 , 否則客源就會慢慢流失。

縱使 Upgrade 可能一濶三大 , 連同電腦及週边装置都要一拚 Upgrade , 對某些人來說一時間可能幾肉赤 , 但其實只要時間接受消化了而資源許可的話 , Upgrade 都只是遲早的事。那份擁有一部性能超卓的勁機 , 那份給你感覺良好” 已是十分過癮 , 絕對能抵消一切負面因素。 

AM不是盲目追求科技及虛榮感重的人 , 自己對添置每一件器材都會理性地分晰而不會感情用事一時衝動就去買。一年前水尾低價買入D700 , 很多人都話遲。 怎料日本三月地震 , 新機遙遙無期 , 而 D700 的價格由底位反彈 , 所以我用得頗開心 , 買機不用太睇時機 , 須要而又負擔得起就可以入貨。  我對現有的 D700 的性能亦十分滿意 , 亦承認 Upgrade 只是理想但並非必要 , 而且用落有感情亦會 D700 保留。自己來說 D800 的規格在那些方面吸引我而又對我有用呢?

l  靜音快門 (這個方便我在會議或在一些清靜的地方拍攝 , 雖然有人話快門聲清脆好聽 , 但我始終覺得幾嘈 , 尤其在你耳邊响的時候)

l  雙咭 (唔怕爆咭 , 可以一張 CF , 另一張可以玩 Eye-fi )

l   91000 像素 RGB 感應器和影像感應器令影像能重現更多的細節。(這個最吸引 , 比現在D3s , D700 得1005像素 RGB 感應器進步太大)

l  14 位元A/D 轉換和16 位元影像處理獲得了豐富的色調及相片層次。(現有 D3s 及D700 只得 14 Bit)

l  低光對焦靈敏度 (雖然 D700 已算唔錯 , 但對比有黑夜之神之稱的D3s仍有少許差距 , 今次 D800 在這方面功能會更加優化 , 對我玩夜拍來說絕對有利。 我覺得這功能比高 ISO 來得更重要 , 因為打你有億萬像 , ISO 幾高都好 , 若部機 “夜盲” , 張張相對唔到焦又或者 Out Focus 真係有幾高 ISO 及像素有等於無。

l  人面辨識 (對我玩 “盲拍” 絕對有幫助 , 起碼唔會 Focus 去咗背景處)

l  DX Mode 都有15.3MP都夠晒有突。( DX 鏡都可以用番)

l  連拍雖然比 D700  , 但只要我 Keep D700 這根本不成問題。

l  36MP 這個像素真係未必用得着 , 我平時可能要降低少少用 Medium Size 就算。  其實各大軟件商如 Adobe 都一早知道呢個 Spec 並已為這巨獸作出配合如 Lightroom 4, Photoshop CS6 都會今年有新版 , 睇來整個糸统升級亦是遲早的事。

l  D800E 的少了低通光學濾鏡能使影像有更多的細節。這個雙刃刀有利有弊 , 真係要睇個實相才能評定。

雖然現在仍未有實機到手 , 要多等一段時間多方面測試去評估真正實力 , 不過 N 記一向都好踏實 , 我相信效果一定唔會太差。

雖然”極度誘惑及心動” 但我絕非行事衝動的人 , 一向我都係睇晒所有使用報告 , Bug Fixed 改善埋, 價錢回落到合理水平先會出手 , 正如我當年入 D700 一樣反正手上又唔係無機用 , 一於睇定啲先講。

最後總結一句 , 升級只係滿足個人心理需要 , 升級相機並不等於啲相會靚咗 , 買器材不送技術是大道理 , 攝影技術及技法須要時間學習及老實紥根地去修練才有好成果 , 這是我一貫認為及會認真去做的。