朋友問我除了我飲的貴價靚酒外 , 有無啲較為親民一點平靚正佳品?  答案當然有 , 但這些好東西可遇不可求 , 而每次我找到這些好東西都一定會公開分享與眾同樂。 遺憾的是我每次一講 , 一班長期讀者就已即時团購及掃貨 , 有時連自己想買返都無貨 。  不過又不可以因為咁而唔 Share , anyway 一切隨緣吧 , 反正酒若是好 , 边個年份都會有一定水準 。  最近我飲了這支 ………..

這是一支由意大利本土葡萄 Verdcchio 釀造屬清香型白葡萄酒 , 但我由頭到尾都以為自己飲緊一支質素不俗的 Chardonnay!

淡黃明亮的酒色 , 散發着高山微冷的菊花、蜜桃、杏仁、薄荷、榛子、菁草的香氣 , 香氣深而凝聚 ; 入口感覺清新 , 渾圓而柔潤的酒體 。木桶元素並不太强烈沒有喧賓奪主 , 果感鮮爽而豐富 , 帶點柚子、柑皮的韻味 , Chewy 帶彈性的質感及 Mineral 的餘韻。 整體來說支酒元素兼備 , 清新自然 , 平衡典雅 , 好飲得來有氣質有文化。

 若要挑剔批評只能說它略為簡約變化較少 , 但當大家知道這只是一支不用一百五十大洋的東西就會即時收口兼感恩 , 畢竟這個價位唔難飲已算交代 , 好飲就是一種恩遇。

當然若要擺個陣與別人格劍鬥酒 , 論牌面氣勢可能有點蝕底 , 但若玩 Blind Tasting 它則是一件很大殺傷力暗器 , 起碼連我飲咗半支都仲以為它是一支1er Cru 的 Chardonnay !!  仲好可能殺低貴佢四五倍的名牌白葡萄酒 , 真係 “刀仔鋸大樹之選 。 而這支酒亦在神之水滴第 14 集附錄中這樣介紹 “ 價格超便宜滋味不輸給特級酒的意大利白葡萄酒『Casal di Serra』”  老實講真是的一點也沒有誇張。

這支意大利白不單可用來淨飲 , 用來配襯中菜亦十分理想 , 可說是一支酒幾種玩法 , 仲有乜投訴。

Supplier:

SINO VANTAGE ASIA LTD

Tel (852) 2581 9129