承蒙朋友們的錯愛 , 信任我的技術 , 唔怕俾我影到鬼五馬六 , 自從學習人像攝影後 , 就不斷有女性朋友要求我為她們拍照。 有些希望我幫她們影些 Profile Pictures , 有些希望影些生活照 , 有些希望好趁青春留倩影為自己留些美好回憶 ………我想汝其俾錢影 Model  “影個殼” 倒不如幫朋友影吓相 , 一來可有練習機會 , 二來可令朋友開心 , 所以時間許可下我都會盡力安排。

我這班朋友並非模或專業 Model , 她們大部份都有鏡頭恐懼症 , 平時一有鏡頭對住就會成個人硬晒 , 所以啲相唔多自然 , 要為她們拍攝真的要費點心思。  要她們眾目睽睽下擺 Post 玩街拍我相信未必可行 , 就算影到都唔慌自然。  另一方面若玩街拍的話自己要帶的東西會很多很多 : 相機、鏡頭、燈具、燈架、反光板 , 我一個人要顧及環境、打燈、照顧及引導 Model , 真係會好辛苦。 有見及此我提議租影樓為她們拍攝 , 反正自從跟 Daniel Sir 學了影樓燈法咁耐都未實習過 , 再唔練吓真係乜都俾返哂呀 Sir。

影樓地方夠大有晒一切燈具 , 我只須帶一機兩支鏡就搞掂可說是十分輕鬆。 影樓內又有更衣室、化妝間及洗手間 , 朋友們可以帶幾套衫更換形像 , 而且全程室內又有冷氣唔使日曬雨淋 , 拍攝又不受天氣影嚮 , 影果個同被影果個都舒服 , 加上租影樓一啲都唔貴 (約二三百蚊一個鐘) , 兩三個人玩三小時除開都係二三百蚊 , 真係不可抗拒的上上之策。

一提到影樓一般人心目中會聯想到呀爸年代結婚那些古老十八代硬照 , 又或者幾十年前打光平板的燈光人像照。 老實講現在的攝影風格及用光手法巳有很大改變 , 加上新穎的燈具及配件 , 柔光罩 , Beauty Dish , 集光罩 , 再配合不同顏色的 Background , 簡單的 Setting 都可以做到 “時裝雜誌” 甚至是 “美白廣告” 般的不同效果。 

當我向朋友提議影 Studio 時 , 她們的反應一般都又驚又喜又擔心。  通常她們會要求我俾一個月時間她們去準備 , 例如要計劃減肥、做 Facial、電髮 Set 頭 , 不斷問我要着乜衫 , 乜顏色一大串問題 。 心情有如去考公開試、見工、相親一樣 , 十分緊張 , 單見朋友們這些反應巳覺十分好笑。
 

我通常叫她們 Take it easy 唔使咁緊張 , 只要“夠瞓” 無黑眼圈就可以。 為影輯相去刻意減肥我覺得除了影結婚相或性感相又真係無咁必要 , 反正數碼年代有 Photoshop 要幾瘦有幾瘦 , 當然我唔會將夏蕙姨改到變嘉欣 , 但適量而又自然的修飾是可以的 。 所以一星期一個月甚至半年準備時間對出來結果都無乜大分別。 對於衣服我建議是一些色彩鮮艶的服裝 , 輕盈飄逸的裙 , 絲巾、一些舒服的 Causal Wear , 一些型格皮褸 , 甚至晚裝都可以 , 一切適隨尊便。
 

我通常都會建議約埋二三個朋友一齊影 , 人太多反而誤事。 一來幾個朋友一齊玩會開心些 , 二來可以互相提點、照顧及模仿 , 三來可以作我助手幫我睇頭睇尾 , 而我只須專注拍攝就可以。
 

每次我為朋友拍攝都有一個明確目的 , 除了相片拍出來要有美感外 , 我更希望能彰顯到她們 “真我” 個性。 這看似簡單但其實是一個很大的挑戰 , 因為每個人的輪廓不同 , 要用那個角度拍攝 , 要用多少光及多少陰影去描繪都有分別。

另外由於朋友們完全無拍攝經驗 , 要怎樣令她們解除緊張心態 , 放鬆心情去進入拍攝狀態 , 怎樣指導她們做一些簡單動作去配合拍攝,  這一切都是拍攝時要即時面對的最大挑戰 , 這亦是攝影環節中與 Model 溝通的一個最好練習。 

每次拍攝我都即時向朋友展示相片 , 當她們看到自己的相片時都會極之開心 , 因為她們從未想像過 Studio 能有這樣的效果 , 而且相片感覺上很 “真” , 絕對百份百是她們的真我個性 。有時我要她們加上一些動作變化 , 她們即時變成時裝 Model一樣 , 真係要幾  “索” 有幾”索” , 要幾” Chok”有幾 “Chok” 。當朋友信心增強後 , 接下來的拍攝就越玩越開心及興奮了。 所以每次拍攝完畢她們都像中毒上癮般影到唔捨得走 , 有些朋友更說好耐未試過玩得咁開心 , 並計劃下次要點玩。

當第一輯 Friends in Studio 相片在 FB 圍內朋友作朋友間有限度分享時 , 反應巳極之好 , 而自己一幅自拍人像更被形容是 “型到爆” 。我每次交貨時俾朋友時她們都很滿足 , 因為她們終於有一輯自己滿意 , 就算十年八載以後都咁喜歡的相片。

自己並非想轉行做攝影師 , 亦無興趣去考取什麼沙龍名銜。 攝影講求 “真、善、美” 很多人覺得攝影是一種個人享受 , 但我覺得除此以外若果能夠利用自己的攝影技術去令別人快樂 , 給好朋友或家人一份美麗及永恆回憶 , 那絕對是一件十分美妙的事。 

當然我能力有限 , 亦非 “黃大仙”  , 對每個要求不能做到有求必應 , 起碼要與我認識一段日子的好朋友才能動用我這張 ”友情牌”   , 因為大家有一定程度的了解及默契拍出來效果會更好。 但我亦無可能個個星期都影 , 影得多都會麻木 , 所以一定要慢慢來 , 給我一些空間及靈感 , 但我可以保證排期一定快過輪候 “公屋” ………………..