一年容易又中秋 , 時間真係過得飛快 , 上年中秋影了兩輯火龍雖然過程辛苦但收鑊尚算不錯 , 影友問我今年會否落場 ?  我自己都未知可否 , 一來由於格格留學海外自己有點情緒起伏未有影相 “Mood” , 二來亦要睇工作時間可否容許 , 今年仲多樣天氣因素 , 所以打定輸數休業一次。

未插香的”裸龍”

追月這天手上工作有變怱然有個空檔 , 又知道馮 Sir 帶埋同學落場 , 於是 Joint 埋馮 Sir 及眾師兄弟一齊落場玩一晚。

話需一齊但其實落到場都係 “八仙過海’ 各施各法 , 各自揾食。 到場時間尚早人不算太多 , 馮 Sir 一眾師兄弟分佈有利位置 , 而我就轉戰追龍位靜候 ………….

在等候中見到香燭檔小孫女幫婆婆搥背的温馨場面 , 就即時給拍了下來了。

Pan 鏡作熱身練習

AM 有上年 “窄巷擒龍” 經驗  , 自然早有準備輕裝跑鞋上陣 , 再來多次埋身肉搏 。越夜越人多 , 到八時差不多又企滿晒人。

今次用了一機一鏡 (AFS 17-55 F2.8)

全幅測光

快門先決自動模式 ,  慢快門 ~ 1/8 – 1/15之間

ISO 800 (Auto ISO 唔夠光相機自動向上調但最盡限制在 1250)

WB – Fluorescent (3900K – 4500K)

高速連拍

等了差不多兩小時終於起龍 ………..

AM 早就拉定筋做定熱身 , 一見龍影就施展身法 , 埋身肉搏 , 由於孤軍而行 , 亳無顧慮 , 邊跑邊影 , 如影隨形…………

今次主要用慢快門用 Pan 鏡手法拍攝 , 一來增加動感及壓迫力 , 亦希望將現場的雜亂人群以一種虛化的方式淡化 , 使焦點可放在火龍身上。

 

最喜歡這張不要問我點影 , 因為我一落場就忘我 , 一切都由自主神經支配主導  , 靚唔靚全部都係 “撞手神” 之作 ……….

 

用搖鏡影龍尾

可能由於之前落過雨條龍重咗定啲火龍健兒做了兩晚有啲攰 , 入到窄巷無咁多人睇住 , 大家亦成機唞唞氣 , 所以感覺上條龍無咁生動霸氣。

 

在窄巷內跑了幾條街 , 雖未索氣但自覺應該有貨可交 , 不等換香及第二場就鳴金收兵早早歸家。

 

今年影集:

http://www.flickr.com/photos/amoksf108/sets/72157625018221566/

雖說 “埋身肉搏” 但亦要顧及人身安全 , 始終香火無情 , 舞者無眼 , 擺動跳跑時難免煙灰火舌飛揚 , 走得太近可能會辣到 , 萬一舞者無力甩手走在旁者就好易受傷。  舞龍者無得選擇 , 拍攝者保持安全距離 , 免生意外 , 亦勿阻人前進 , 大家配合才可互惠及盡慶 。