這次是跟香港攝影學會馮 Sir 第三次出外攝影練習 , 今次全團有成 73人頗為人多要分兩架旅遊車 , 人多照顧上真的較難 , 但好在拍攝的地方範圍大 , 而且大家有 Walkie Talkie 基本一講就個個收到訊息 , 溝通上絕不成問題 , 而且團友個個都好有禮貌 , 好多師兄師姊都像 AM 般多次捧場熟口熟面 , 一齊影相交流心得真的十分過癮。

今次拍攝的主題跟上兩次有些不同 , 東江及風車島、品青湖有些日出日落大景 , 今次主題是花花草草則較靜態。 而今次最遺憾的是天氣 , 這兩天天色灰矇矇 , 有時仲灑兩滴雨 , 有陽光的時候只有短短的半小時 , 影人就好影景就真係麻麻 , 不過户外拍攝呢啲情況預咗。

今次帶了四支鏡:

AFS 17-55mm F2.8

AF 80-200mm F2.8 (主力)

AFS 60mm F2.8 Micro (好少用)

AFS 35mm F2 (好少用)

第一站的石門國家森林公園 , 這個公園好大有梅花、紅葉、油菜花 , 薰衣草……….好多影區 , 當然不能與南京的梅花、日本的紅葉、雲南羅平的油菜花、北海道的薰衣草規模相比 , 而且時值農曆十一月未必是花期 , 有啲可能未開有啲又造尾但勝在集中樣樣有 , 作為練習倒是個不錯的地方 , 反正呢啲情況影到第日去到大境就唔使擔心唔識影。

梅花其實幾難影 , 因為梅花花朵細小 , 影單一朵花會單調影多花會雜亂 , 而且梅花偏白 , 好易 Over 冇晒 Details , 加上天色灰暗 , 啲色唔起真係頭都大埋。 前輩教落影梅花要影枝節 , 以枝顯其剛 , 以花展其柔 , 但我揾咗好耐都揾唔到啲有氣勢的枝節 , 苦無良策唯有玩 “多重曝光” 。

所謂“多重曝光” 即是一張相影幾次 , 將幾張的影像重疊製造特別效果 , 這個功能只在 N 記機內才有 , C 記朋友唯有事後用軟件後製。

上圖這張相石門香雪同梅花跟本有段距離 , 我先影一張 Out Focus 石門香雪作背景 , 然後走去揾支梅花放在一個 Right Position 出來的效果 , 這個屬於移花接木式多重曝光。

第二種玩法是同一枝先玩 Out Focus 再影 In Focus , 咁就出現咗啲霧化效果。

將底色轉黑白 , 題埋首詩增加畫意。

 

多重曝光係 “無中生有 , 創作無限” 但有幾點要注意:

1.    多重曝光最重要的是每一張都要減 -1至-2EV , 咁重疊咗個影像先唔會過曝。

2.    幾個影像重疊會好亂 , 所以每幅影像越簡單越好。

3.    相機多重曝光有個叫 Auto Gain , 我多數 Off 咗佢。

4.    為免影像移位 , 可利用腳架。

5.    其實利用多重曝光功能亦可玩 HDR , 但光度控制會好考功夫。

這個石門國家森林公園真係好多新人在拍婚紗照 , 有好多免費 Model 任拍。 當日天寒地凍我哋個個着晒羽絨圍巾手套 , 但見許多新娘個個跌膊吊帶 , 輕紗蟬衣 , 而且神態自若毫無寒意 , 妞腰擺拍甜笑焉焉 , 真的由心佩服 , 愛靚真係可以唔愛命。

第二個點影紅葉 , 紅葉的確好多 , 但顏色暗啞瘀黑 , 要等好耐才等到少少側光。影紅葉最好用側光或逆光 , 咁先可以影出紅葉層次及通透感 , 但可惜是日陽光欠奉 , 只能偷到一兩張。

 

這位 Model 好有 “特質” , 好易將佢唔好的地方影晒出來 , 所以要影得佢靚要考考功夫。

此 Model上次汕尾風車島都係佢 , 表情甜美自然 , 團友自然熱烈幫襯。

第三站是油菜花田 , 這田位於山頂在一個湖的旁邊 , 湖光山色加上當日湖面大霧又有油菜花田 , 其實地方好靚 , 但係真係又大風又凍。

不過我哋未算慘 , 果班影婚紗的新人仲慘 ………..得果十度八度仲要扮到簫灑自然 ………

呢 Pair 幸福啲可以着褸 ………

凍到要用 “眼火” 取暖對方的新娘 ………..

影友 ………..

全日唯一見到陽光一刻 , 湖上仍有霧做成對比。全日最靚的雲彩 , 可惜衰多手 Over 咗少少 ………

影咗個零鐘影到日落西山 , 越影越凍 , 吹到頭赤 , 頂唔順要提早走人。

是日拙作:

http://www.flickr.com/photos/amoksf108/sets/72157623187980212/