自己今年的大計中除了 Project 170 外 , 第二個想做的就是認真的去學習攝影。

我以前講過 , 我影相全都是靠感覺行事 , 自己盲摸摸去撞去試影出來 ,  雖然啲相還算做見得吓人 , 但始終覺概念不清 , 手法不正 , 好想 Back to Basic 由基本學起 , 打好個底。

雖然自己對攝影視為一種興趣 , 但對攝影課程卻頗為揀擇 : 太商業化的、太貴、太專業、課室太遠、導師太大個人主義、太講自己想當年的 , 自己都不會選擇 , 所以一路尋找都未有合心水的對像。

幾個月前跟朋友第一次參加攝影團 , 覺得隨團位攝影顧問 Fung Sir 唔錯 , 講解實際 , 又得知佢開班授徒 , 加上時間、上課地點、價錢、Timing 樣樣都非常Good Fit , 所以順理成章就去報讀。

原本想自己一個人靜靜雞去讀完就算 , 但心諗俾班朋友知道一定會 “死無全屍” 只好遵例在  Facebook 度輕輕 “噏一噏” , 諗住搏大霧無人知瞞天過海。 點知巳有多位朋友查詢 , 有啲好奇仲問  “你影得咁好都仲要讀初班唔係呀? 你咪玩呀 Sir ?” …………. 當然我自有我的原因 ………. 

好自然我一話去上堂就好像磁石咁吸引咗一班朋友跟埋去 , 幾個有心的朋友仲第二日就報埋名兼交埋錢 , (幾乎仲快過我) , 唔使講個班好快就爆滿。 我計過我果班 “藤拎瓜瓜拎藤” 都有十個八個自己友 , 仲有啲因 Schedule 夾唔到或滿咗額報唔到名。

我不敢在 Blog 內宣揚 , 因連我自己都未試過的東西 , 我又點敢亂去介紹別人 。 而且自己知自己事唔想踩冧人哋個場。

九月初上課日子到了 。課室不大坐滿人其實頗擠逼 , 導師 Fung Sir 好快講解一些基本概念 , 但着默頗多關於相機功能的運用。我相信好多人同我一樣睇唔明本說明書 , 對相機內的功能大都一知半解或只用了一小部份 , 課程正令我清楚了解一些相機操作疑問及迷思 , 對我來說是非常實用。

到最尾幾堂講相片構圖、色彩運用法則 , 沙龍相、考試相、旅遊相的取向分別 , 經導師一講睇埋 Samples , 睇的方法層次完全唔同 。

最重要的是導師常强調相片的內容 , 攝影角度思維 , 搏捉瞬間時機神韻 , 鏡頭視角的運用 , 攝者的感覺投射 , 而非注重相機的性能 , 鏡頭品牌成像質素的高低等 , 避免很多只追器材搞後製做相的心態 , 我覺得這才是攝影應有的態度及挑戰。

上課後再睇番自己以前所影的相 , 噢!! 原來真係影得好差 , 好多毛病都犯上 ………….

同行的幾位朋友都覺得很滿意 , (總算對得住幾位 You Jump I Jump 的朋友) , 我巳決定將來有中班及藝術攝影班都會繼續報讀。

大家一定會追問攝影班資料 , 十一月將再有新班 , 有興趣的請自便。但以上只代表個人觀感只供參考。

http://www.pshk-photo.org.hk/index.php?option=com_content&task=view&id=321&Itemid=58

過幾天重陽節假期 , 我將會跟導師出團兩天去汕尾實習實習。

http://www.pshk-photo.org.hk/index.php?option=com_content&task=view&id=307&Itemid=0

先借用別人的照片一用 , 回來再作分享。