AM 的活動總是一輪輪 , 有時連續幾次 Wine Tasting Events , 有時連續幾次攝影活動 , 跟着又靜一排 , 相互交替 , 這輪無疑是影相期………..

月前大隻佬問我有冇興趣去影拳擊比賽 , 大隻佬個心不知幾想去影相 , 可恨要開工去唔到。 雖然自己對這類技擊性運動的興趣不大 , 但對這類剛陽性勁度十足的動態拍攝卻十分有興趣 , 反正自己架生亦齊備 , 亦好想試試這類拍攝挑戰 , 加上 Gym 內亦有 Trainer 會去捧場 , 於這就買票入場攞攞拍攝經驗。

以下是今次拍攝自己的心得 , 只供參考。

當天今次帶了三支鏡:

AFS 17-55mm F2.8 (後備)

AF 80-200mm F 2.8 LB 3 (主力)

AFS 300mm F4 (若坐得遠就要出動)

一支單腳 (因整個拳賽表演有 3 – 4 個鐘 , 托住支長炮咁耐第二日隻手真係會癱瘓 , 而且坐的地方又窄用唔到脚架 , 你會發覺在這種場合一支單腳真係不可缺少。)

足夠 Ram Card 及後備電 (動態連拍一秒幾張會唔覺唔覺會影好多 , 所以一定要有所準備。)

閃光燈可帶但不作用不大 , 尤其比賽期間閃光絕對會對拳手做成騷擾 , 又會破壞現場氣氛 , 坐得遠跟本唔夠力 , 只是在中場影吓人才有用 , 所以可以不帶。

影這類拳擊運動有兩個理想距離 , 第一梗係台前 Ring Side ; 第二就是離台十零呎 , 比圍繩水平高幾行就最好 ; 前者一支大光圈 50mm 或 17 -55mm 夠殺 , 後者一支大光圈 70 -200mm 真的進可攻退可守。 

今次買了 $450 的貴票 , 坐第八行位置及高度算是十分錯 , 而支LB3 雖是上幾代的銘鏡 , 對焦速度當然比不上 LB5 但亦十分稱職夠用 , 加上我用單腳增加隱定性 , 質素絕對有保證。

今次相機 Setting :

用全手動 Manual Mode  (試過用光圈先決及快門先決自動 , 但相機本身系统設計一向較為保守 , 會有好多限制及補足性調控 , 吓吓 ISO 會跳到好高才影到 , 反不及全手動 Manual Mode 將相機及鏡頭性能發揮。)

光圈開盡 F2.8 – F3.5

快門由 1/40 – 1/125 (視乎自己要動感的多少及拳手的動作快慢 1/60以下就好有動感無影手 , 1/60 就正常 , 1/125 就可影到汗珠)

用Center Weight 中央重點測光 ; 視情況 + – EV 作微調

Auto 白平衡 (因比賽、過場休息、拳手出場時啲燈光都有啲唔同 , 入場第一件事是要先 Set 白平衡 , 否則全輯相會色偏 “黄禽禽” , 試過幾個 Setting 都覺得 Auto WB 都幾準 , 於是唔使煩。)

Noise Reduction – Normal

ISO Sensitivity Set “On” 範圍由 200 – 3200

AFC (Continuous Servo Autofocus) + 51 點 (3D) Dynamic Area AF + Auto Focus Lock On at Normal 

一秒 6 張高速連拍 (不要以為你 Set 咗一秒 6 張高速連拍 就真的可以影到 6 張 , 這要配合快門速度要在 1/150 以上。 有數得計若快門太慢加埋 Noise Reduction 的時間真係要咁耐 , 但拳賽中的燈光環境 , 鏡頭光圈及身處距離都有限制 , 除非你可以在 Ring Side 台邊 , 用 50mm F1.8 大光圈你就真係可以去到一秒 6 張高速連拍咁快。)

我講過入門機同高階機最大分別是兩者的速度 , 包括相機及鏡頭對焦、追焦速度 ; 快門 Shutter Lag , 連拍速度。 科技進步相機的運算能力巳非常之高 , 加上高 ISO 的幼滑程度 , 現在運動攝影比以前輕鬆得多。但話雖如此 , 入門機種去影這類動態真較吃力 , DC 更好難會影得好。一言敝之器材越靚影到靚相機會越大。

 

什麼時候按快門去捕捉影像是我今次的最大課題?

·    跟據今次觀察 , 拳手在第一回合會有些試探性動作 , 第一回合中後期及第二回合最多埋牙機會 , 第三回合拳手開始無氣 , 所以要找緊當中黄金時段。

·    三個回合可用三種不同快門 , 如 1/60 , 1/125 , 1/40 去搏捉不同程度動感。

·    尤其要特別兩位拳手之間的”距離” 拳手唔想出手時會與對手保持一段距離。 當距離進入起腳及出拳所及的射程範圍就要開始準備半按快門 Lock 住其中一個目標對焦準備 , 當拳手衝前就表示發動攻擊就要按快門 。

·   永遠追住較佔上風的拳手。

·    要細心觀察拳手的節奏及攻擊模式 , 好多時第一拳是試探 , 之後對手犯錯就會連環出拳 , 所以第一次影不到亦不要鬆懈 , 而對眼要一路跟實拳手。

·    當兩位拳手交手兩三吓就會攬埋一舊 , 這時就可以鬆一鬆對焦 , 休息一吓。

 

打到 Mouth Guard 都飛甩

大家可能同我一樣好怕啲拳賽好似電影咁打到七彩、眼腫面腫流晒血 , 其實這類公開比賽並非街邊爛仔打交 , 又有拳証在場 , 每場三個回合 , 一個回合三分鐘以點數定輸贏 , 基本上打得好體育性及好斯文 , 埋牙打幾吓就會攬埋一舊 , 所以唔使擔心有吔血腥暴力 (地下拳賽另外) 。

當晚打咗十幾場 , 睇咗差不多四個鐘 , 咁多場邊個打邊個我真係唔知 , 但都算精彩 。

反而場內的氣氛就十分刺熱 , 强勁節拍音樂 , 美女穿梭 , 又多老外 , 又有啤酒賣 , 十足蘭桂芳一樣 , 好 Relax , 可能因為咁有減壓作用 , 啲觀眾歡呼叫囂仲肉緊過在場中打果兩個拳手 , 有時有啲觀眾爆 一兩 粗言 , 餟核抵死 , 都幾鬼好笑及過癮。

除比拳來脚往的比賽外 , 其實場邊好多花絮人物可影 , 是一個不錯的攝影題材及練習 , 當然能落到 Ring Side 就更加不能錯過 。

當晚唔覺唔覺影咗 13G 相共 3600 幾張 , 篩選後都有 2/3 係 OK , 咪話唔誇張。 當然無可能全部 Upload 晒 , 好辛苦咁挑選了 650 張最精彩的俾大家分享。 所有相只有裁切 , 原汁原味無任何添加 。

http://www.flickr.com/photos/amoksf108/sets/72157622421804077/

上次影完健美先生比賽後 , 好多女性朋友時常追問我幾時再有呢類 “肉照” , 呢輯相佢哋應該可以有排 “嘆”。