火龍的考驗二 – 窄巷擒龍

h1

在迎月那晚影完火龍出相後 , 大隻佬看後心郁郁 , 決定在中秋當晚走去試鏡 , 影完返來頭擰檸話好鬼難影 , 心思思話要上訴。

自己原本追月果晚有啲嘢做 , 推咗幾個約會 , 但事情發展順利可以早收 , 咁啱師姐又話要三戰江湖 , 反正有家閒着無事 , 於是約埋大隻佬 , 人去”追月”我哋去”追龍”。

h2

動態拍攝最難是無時間俾你諗 , 有上次經驗今次醒目 , 只帶一機一鏡 AFS DX 17-55mm F2.8  , Setting 同之前所寫的一樣 用陷井對焦法 , 焦點 Set 在一邊位置 , 目標一入對焦位置即半按快門追焦 , 搖機 Pan 鏡有得做就做。 加上黑衣輕裝、”較腳”跑鞋、清水毛巾 , 完全戰鬥格上陣。

當晚一樣咁多人 , 1930 hrs 去到成條浣沙街四週巳企滿幾層人 , 除非用五級高梯否則都幾難埋到去唔使諗 , 直上浣沙街斜路融苑 , 李陞大坑學校一帶駐扎 , 取其人少、無封路可以埋到龍身 , 進可攻退可守 , 機動性强 , 今次直呈坐在馬路中心去等 , 又是一輪的等待

時機一到條火龍就舞上嚟 , 原本坐變企 , 拉定根做定熱身 , 準備同佢死過 。 由於人少我哋可以追住條龍走位去影 , 係咁邊跑邊影 , 而且避咗好多無謂的工作人員 , 命中率大好多。

h3

舞完一輪 , 條龍就落番浣沙街表演 , 等咗一段時間都唔見上嚟而且有入橫街的趨勢 , 同大隻佬打個眼色決定走位 , 兩條友連同師姐班影友飛奔轉打巷戰。

h4

突破了幾度防線四面包抄去截龍 , 條火龍會在橫街中穿插 , 亦為一些有開舖的食店前停留舞動及採菁” , 所以好多埋身機會 , 加上橫街中燈光較暗及樓影 , 煙火較聚加上不同燈光好有氣氛 。 由於窄巷內無封路 , 所以可以近距離捕捉 , 我之前話過俾我埋到身我就好有把握 , 唯一缺點就係好似走難咁 , 走九條街去追截。

h5

好在我修身成功 , 加上自少在街市中長大 , 在人群中亨”功水上飄 , 如濕水欖核咁左穿右插是我專長 , 大隻佬同我真的矯若遊龍 , 健步如飛 , 無人能阻 , 差佬幾次想截都截唔住

h6

大隻佬後生我十幾年 , 但見我呢條 “中坑” 如鬼魅般的身法 , 怱然在前 , 轉頭在後 , 只有過之而無追不及 , 由頭玩到尾都 , 仲面不改容毫無氣喘 , 體能之勁睇到佢眼都突埋

h77.jpg

玩完巷戰條龍出番浣沙街表演 , 我哋一於死追 , 但轉為低調 , 亦為及其他在埸人士設想 , 我同大隻佬都屈低身走 , 蹲在鐵馬一邊低抄咁影 , 利人利己唔好自己玩晒 , 咁就唔會有人投訴。

仲俾我捕捉到呢段 “雙珠戲龍”

 

 

又影一輪 , 條火龍啲香都燒得七七八八 , 趁機會走入蓮花宮一帶就在那邊影埋 Last Shot 收工 , 係果時先收慢步法咁先俾呀 Sir 截到。

h13

其他影友早巳不見踪影 , 大隻佬渾身大汗 , 大呼過癮 , 今次真係靚相險中求

黑夜狂奔 , 地面不平 , 又多障礙 , 好易碰撞 PK , 機毁人傷 , 今次行動危險性頗高 , 我倆經長期訓練大家安全至上切勿模仿。

今次輯相覺得條火龍影得好生猛 , 好有動感及逼力 , 十分滿意 , 大家不妨感受一吓。

http://www.flickr.com/photos/amoksf108/sets/72157622513780346/

 

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s