這天終於完成了最後一堂的健身課程 , 亦為六個月來的修身工程來一個成績總結。
體重總共減了22 磅 , 現在體重維持在 166 – 168 之間 , 脂肪比例由 24.3% 跌到 18.5% (以我高度體重正常為 18%) , Body Fat Mass 由 20.5kg 去到 14.3 kg (即減了 6.2kg 純脂肪! 大家若有睇報紙某消脂廣告的可以知道那件脂肪你幾大舊) 。 新陳代謝率依然保持在未減肥前的水平 1650kcal 左右 , 即意謂我有更佳的消脂能力。
衭頭由 35+ 跌到落 31左右 , 所有衫衭全部要買過晒!!! (有女性朋友說我的腰比她還細) ; 豬腩肉消失 , 前腹回復平坦 , 兩邊側腹肌 (士啤呔) 還有少少可再修緊。
原本之前的高血壓變回正常 , 整個人感覺 Young & Energetic , 我真正如我所願做到個 “可樂樽” , 如此成績可說是十分嬌人 , 真係可以去做代言人。
數字上當然最理想還可減多 3 – 5 lb , 純以減磅來講這個不算太難 , 但我寧願將它這幾磅轉化為肌肉。
身體是均衡了 , 結實了 , 但自己的胸、膊、手臂肌肉仍未算十分 “發達” 與 “健磊大隻佬” 仍有一段大距離 。 其實大家在健身室見到果啲大隻佬 , 佢哋起碼玩咗 3 幾年至十幾年 , 我目的只想 Drop Fat , 肌肉結實小小 , 等着衫好睇啲唔使鬆透透 , 並非要練大隻 , 所以現階段只須 Keep Fit 。
有此成績當然魔鬼教練居功不少 , 佢令我對運動有新認識及感受 , 從懶做運動到現在上咗癮 , 都係拜佢所賜 。 佢成日有句口頭禪 “透過健身改變人生” , 我聽親都”爆笑” , 笑佢呢句十足 “平覇廣告” 一樣咁鬼老土及 Hard Sell 。
不過玩咗咁耐真係有啲上癮 , 尤其享受 Weight Training 後那種肌肉冤痛感 , 感覺非常實在 (可能我真有點自虐狂) 。 有時三兩日唔做運動總係週身唔聚財。 老實講訓練期間真的頗為艱苦 , 但我知我就是缺少了這些肉體上的磨練。
玩咗咁耐明白到一個好教練同一個普通教練 , 同無教練分別在於二個字 “ Effective & Result” 。我雖無試過其他教練唔敢亂講 , 但我好相信魔鬼教練真係十分有料到 , 佢對每一部機佢都瞭如指掌。 你諗住自己睇圖自己玩 , 無錯係做到少少 , 但原來隻腳放高放低 , 坐高三幾寸出來的效果會完全唔同 , 有幾次自己玩 , 玩完幾組都覺得無吔料到 , 走去問魔鬼教練 , 佢依我身裁少少調教真係當堂唔同晒 , 啲力”應”在瞓練的肌肉上而非去晒啲關節。
前排我心急想收腰兩傍的 Call 機肉 , 見啲師兄攞住啞鈴做 Side Crunch 自己又跟住做 , 之後俾魔鬼教練”串” , 佢話千祈唔好練大果兩舊肉 , 佢話除非你好似啲男摸咁長期收到好乾身無吔脂肪就得 , 否則一有脂肪就成舊突晒出嚟 , 仲現仲難睇 , 而且舊肌肉好難會消失 , 到時真有排搞 , 所以佢一路都無教我做就係咁解。 佢解釋 男 Model 果啲六舊腹肌係要將身體脂肪降到好低好低 , 戒食糖、油、澱粉一段長時間 , 是地獄式非人生活 , 好似玩比賽咁 , 犧牲好大 , 所以一般正常人跟本無須要。
魔鬼教練話男人要有肌肉女人要有線條 , 唔一定要大隻 , 但肌肉一這要夠強度 , 瘦猛猛骨慘慘並非好事 , 因無肌肉 Support 所有重量或受力落晒啲骨度, 會出現好多關節問題出現 。 而且肌肉弱 , 失去控制力就會更容易扭傷或有腰酸背痛 , 骨刺神經痛等都是肌肉太弱的後遺症。
好多人運動受傷都係用錯力 , 用晒關節的力而非肌肉的力 , 我自己都領過嘢 , 有幾次自己心急 , 操啲教練冇教過嘢 , 方法用錯攞得太盡拉傷了少少關節 , 痛咗成個星期。 事後當然比魔鬼教練” 少炳” 話跟佢咁耐都吸收唔到佢啲精粹 , 而一些 Program 並不是個個人都啱玩的 , 如果個個自己都玩到練到亦跟本無須要俾錢揾教練 …………咁我都相信佢吔呢科真係好有學問 , 而且理論加實際經驗 , 能夠一矢中的才顯得佢哋有身價。
同魔鬼教練一個鐘頭 Training 無吔吹水 Dum 鐘 , 別人玩四組動作我玩五六組動作 , 真係絕無冷場 , 人都散 。 佢最憎人Hea 嘥佢時間 , 你有無心玩佢 三兩 吓就知 , 你有心玩佢一定操到你 。 當然做人要實際你要佢六個月內將你由肥佬滔操到變尚格雲頓咁 , 這些天方夜談的事跟本無可能 , 佢會叫你唔好發夢 , 唔會你點你 , 得就得 , 唔得就係唔得 , 無把握的事佢唔會應承你。 因為減得太快身體跟本適應唔到。
魔鬼教練相對這段日子我們亦建立了友誼 , 加上我人緣好 , 又幫佢影果輯靚靚比賽相 , 同佢真係幾好朋友 , 無疑魔鬼教練外表真的有很 Cool , 有啲似賭神呀 “龍五” 咁唔係點笑 , 但係其實個人好 Nice , 同佢熟咗真係有講有笑 , 而且好肯教人 , 會解釋清楚原因及理論 。 而且我這個常客亦同健身會的一些教練混熟了 , 有吔問題隨時可請教佢哋 , 有了這班專業朋友做支援 Support 真係無得頂。
我整個過程 40 堂埋單計數都要 “二皮幾嘢” , 老實講一啲都唔平 , 真係成套 Nikon D3 都買到 , 問我當然係肉痛 , 所以一定要有成績才對得住自己。 大家唔好睇得咁過癮 , 人去你去 , 去之前要諗清楚 , 要有此心理準備 , 除非你淨係自己只 Joint 個會藉 DIY 都一樣得。 Trainer 同 DIY 分別只是二個字 Effective & Result 。 一掂親 Trainer 都要 $500 – $700 一堂咁上下 , 大家按自己的經濟狀況買 Plan 吧 。 如果有心玩以我個人親身經驗 , 因身體要時間適應調節 , 六個月四十堂左右這個比例其實較好 , 玩完唔夠先再加 , 起碼自己多點彈性。
當然我亦知道很多關於健身會的負面報道 , 我都覺得對一些未有很大決心、對運動健身毫無概念或意志薄弱的人 , 一吓子 Sell 佢幾皮嘢一個 Plan , 真係會好難接受 , 有點 ‘迷債 Feel’ 。 大家成年人都要時間適應及建立互信。 正如我第一次去看個新醫生 , 醫生就要幫我開刀 , 病人未對醫生有信心點肯俾你開刀? 道理一樣 ？ 設個冷靜期係件好事 , 或有些十二個月供款 Easy Plan 會較好 , 反正有質素有口啤生意自然找上門。 我亦都同相熟教練反映了 , 但基於公司制度佢哋都係打工 , 只能將訊息上傳。
講開醫生 , 我上星期見番幫我年初做體檢個醫生朋友 , 佢見我 Fit 咗咁多佢都嚇咗一跳 , 佢都話 “健康無價” 呢筆錢非常有價值 。 這位醫生老友知我喜歡品酒又玩影相百足咁多爪 , 佢話我身體唔好就可以收山吔都唔使玩 , 試想有吔病痛入一入廠或食藥補救都唔止呢個價錢 , 又或者去一次旅行都無咗 , 佢仲講一句好鬼到肉 “呢個跟本唔係錢嘅問題 , 而係恆心同時間問題” , 咁又係真。
AM 嫂同格格暑假前都 Joint 埋健身會 Members , 雖然冇揾 Trainer , 但呢 一兩個月跟我 Set 俾佢哋嘅 Program 晚晚去踩機 , 做啲最基本嘅 Weight Training , 體重都明顯有下降及身型有所改善 , 佢哋都好開心 , 我相信她們目標一定能達到。
AM 的品味人生 