幾個月前酒友推介一處身處運動埸內的隱世食店 , 主理的廚師是位國家金獎名廚云云 。

酒友即時搭橋搞局 , 收到菜單一看有點不可置信 , 又蝦又蟹又鮑片 , 雞魚官燕佛跳牆 , 一圍十四人全包唔使二千!!!!  除開即一人唔使舊半 !! 心諗茶餐廳晚飯套餐都五六十 , 百五大洋有呢啲嘢食 , 邊有咁大隻蛤乸隨街跳?? 不過人總是喜歡用不同方法氹吓自己開心 , 反正我不入地獄誰入地獄 , 在好奇心驅使下我們一班酒友就擇日踩場。

這食肆位於西灣河運動場內 , 前身應該是間西餐廳 , 裝飾不中不西 , 有點熟食店格局 , 地方不算很大 , 約十圍咁上下空間 , 全部食 Set Menu , 唔見有散食餐牌 ; 嚴格來講用”套餐飯廳” 去形容這 “餐廳” 兩字較貼切 。

當天好像有一份免費報紙報導這所食肆及廚師故事  , 所以主廚顯得十分興奮 , 穿花蝴蝶般滿埸飛 , 並收集剪報 。可惜 AM 無緣拜讀 , 希望日後找到資料再作補充。

正在等待其他酒友到齊之際 , 咋聽隣枱 “嘩” 聲四起 , 轉身一望驚見一直徑約 18 – 20 吋銀色似爐非爐似盤非盤物體放在枱上 , 一打開原來是一個海鮮大雜會的菜式 , 大蟹、蜆、龍蝦等疑似物體 , 看似極之豐富。 

只見隻蟹鉗長過隻筷子 , 真係大得有點誇張 , 此菜原非 Standard Menu 一定要預訂才有 , 唯有留個機會下次吧。

當晚碰巧是柴九哥及四奶奶的大結局 , 全場一早滿座 , 大家都提早開飯食飽等睇劇 , 而每到廣告時段就集體離席補洗手 , 可謂十分本土風情及熱鬧。

AM 從來無追劇習慣 , 反正來來去去三幅被 , 上至 Laughing 哥今次柴九一一搭不上半句 , 只能 “噢” “嘩” “係咩”  三招輪流使用 , 做其應聲蟲 ,  倒也混瞞得過去與眾同樂。

酒友終於到齊 , 腹似雷嗚立即開飯 ………….

川芎元肉杞子桑拿蝦  – 以蒸氣營做桑拿效果

蝦子鮑片金錢生財 – 鮑片其實是魷魚片

喜氣洋洋新疆火焰羊架 – 玩完煙又玩火 , 真的夠觀能剌激

百合腰果西芹花枝片帶子 – 帶子何處尋??

阿拉斯加大蟹 (四斤以上)日本粥底 –一人兩碗仲有剩

春回大地爆丈雞 – 啲最好味

海龍皇鮑魚翅湯 (佛跳牆) – 如果佛因它而跳牆, 那真是一件彿門悲劇

櫻花白雲扒碧綠

清蒸鴻運大金鮋

香江黄金裏蒸粽 – 日本木魚花加蛋黄裏蒸粽 , 算是 AM 今年的第一口粽 , 不過切記要點辣醬。

上湯過橋絲綱鮮蝦卷

南瓜椰汁珍珠燉官燕 – 疑似官燕質感

生果拼盆

當然這頓飯在視覺觀能上真的超標完成 , 大大碟的菜式 , 又煙又火焰 , 又有吱吱喳喳聲 , 聲色俱備。 講到食物味道水準是 “可以的” , 並非難吃。所謂一分錢一分貨 , 餐廳亦好老實 , 買舊半就俾足舊半 , 無花無假  。只是菜式名字有點令人聯想到富豪飯堂的菜式吧了。這個是自己不切實之過與人無尤。大家若追求本質方面上的滿足 , 當然要付出多一些代價。

 

餐廳 No Corkage 又提供基本酒杯 , 只係雪桶及冰欠奉 , 要雪得好凍的香檳及某些白酒 , 我建議你可慳番。

食完一頓充滿藝術而內容一般的晚飯 , 心情感覺平靜 , 滿以為可以歡樂今宵  , 回家休息 , 但原來還有一高潮 …………..

當播完柴九哥後 , 全場燈光突然熄滅 , 一個在八十年代夜總會最流行的銀色光球打出全場流星雨點效果 , 我以為柴九哥大駕光臨 , 點知擴音器播出了一首中西混合的雞尾生日歌 , 然後幾位傳菜的 Susan Boyle & Paul Potts 一字長蛇列陣 , 一人手捧一蛋糕 , 以婚宴乳豬出場的步伐 , 齊整地由廚房魚貫操出 , 再在大堂以仙女散花式的步法分開 , 將生日蛋糕送到在場的兩、三張枱上 , 再為壽星高唱生日歌 ……..

我發夢都估唔到在此能看到這般訓練有素兼”頂癮” 的排場表演 , 我幾乎連口中糖水都噴埋出嚟 , 心諗好彩自己唔係當事人 , 自己心血少真係會曝弊當場 ………