借用網上照片

到今時今日講今年的大計似乎有點過時 ………..

AM 在年初的時候做了定期身體驗查 , 雖然出來的結果沒有什麼 Clear & Present Danger , 但很多指標都是臨界線 , 種種跡強都隱藏潛在 “結構性中年健康危機”。 醫生兼老友叮囑要小心及開始做嘢 ,  今日無事難保三、五年之後無事。  我以前講過”鐵窗效應” , 我會怱略小問題的警戒訊號 , 醫生老友的意思我絕對明白 , 我亦對自己講 It is time to do something。

大家可能不會相信五年前 AM 最高峰期有 198 lbs 真係成個郵筒一樣 , 自己企响度都見唔到對腳 , 而膝蓋因長期負重而勞損 , 諗起都覺得可怕。 後來決心減肥 , 八個月內體重回落到 178 lbs , 企响度終於見番自己對脚及可以做返運動 , 這段時期維持了足足一兩年 。 但後來因為疏懶、膝蓋受傷及 Pick Up 了葡萄酒興趣 , 飲飲食食 , 這一年身型回漲不少。

“入多於支自然豐 , 入不膚支自然窮” , 這個道理十分明白 , 自己坐擁豐厚儲備(脂肪) 其實與自己生活習慣有莫大關係。美食誘惑及缺少運動 , 體重好容易從 拾升 軌。試想若我去 Wine Dinner 的時間反過來做運動 , 那就一定 Fit 晒多過 Fat 晒。  雖然飲飲食食開心到極 , 但若然暴飲暴食就會好快瞓直 , 自己年紀不輕 , 新陳代謝率減慢亦不復當然神勇 , 總要聽聽医生忠告 , 節制節制 , 約束約束。

於是我就開始計劃及實行一連串行動 –Transformation Project 170。  簡單一點就是要減體重 10% 及將身體某些指數達回安全範圍內 , 自己訂立限期為 6 – 8 個月達標。 這個 Project 並沒有什麼特異之處 , 只是控制飲食及有恆心地做帶氧運動 , 加中藥調理令血氣運行好啲。

通常一般人減肥失敗是因為持續性及與本身生活模式衝突 , Project 最難之處就是持久力及恆心 。我巳改變我的思想模式及日常運作系统 , 將運動納入每日的日程內 , 加上工作及住的地方附近就有大型連鎖式健身中心 , 一於起心肝入會做運動 , 由入會到現在 , 基本上一星期係去四五日左右 , 尚算勤力 。而且漸漸享受運動的舒暢感 , 人變得更精神亦睡得更甜。

飲食控制方面參照了營養師的建議 , 早午晚三餐保持清簡 , (有點似醫院病人餐一樣) , 當然真的是頗沉悶 , 但試行了差不多一個月都習慣了 , 可喜的是食得清簡後對味道變化更敏感。  

Wine Dinner 頗密是整個 Project 中最挑戰性的 , 當然醫生建議更係一刀切 Cut 晒佢 , 若我咁做班酒友會好傷心 , 但我覺得未必須要做得咁盡 , 我會盡量減少出席 Wine Events , 必要出席就要做 Professional 咁要 Split , 一星期廿幾餐 Control Diet 一餐半餐 Wine Dinner 吊頸都要唞吓氣 , 但絕能放縱致前功盡廢。 我相信自己的自制能力 , 所以酒友要明白 AM 的處境及苦衷。

大家用擔心我會停 Blog , 改變會在無聲無息地進行 , 大家不會察覺有何大分別 , 就算我唔寫酒都大把無謂嘢寫 , 而且我一篇品酒筆記成篇論文咁長 , 讀者都須要時間消化 。有朋友同我講 , 當我寫完一支酒的品酒筆記後 , 佢就會被人追揾酒 , 出得太密會做鬼死朋友。

識我時間較耐的朋友都很明白我做事的認真模式 , 一係唔做 , 一做就好投入咁瞓身去做 , Passion , Planning , Organizing , Action , Enjoy ……..

由二月初至今 , 體重巳回復到之前178 lb , 但未算滿意 , 更明白不能自滿 , 低處未算低 , 我想再下試低位 , 這是一個漫長艱苦作戰。

photos from Jack Hindmarsh

我自己對金錢投資頗蠢頓 , 懂什麼股市、金融投資 , 我只能將資源、時間 , 投資在自己健康或興趣方面。牛年對我的寓意是 : 重回基本 , 腳踏實地 , 默默耕耘 , 努力苦幹 , 並是什麼牛氣冲天 , 財息兼收的假大空 , 簡單一句就是 Just Do It ………….

希望 6 – 8 月後大家見到的是一個 Transformation 成功的 AM。