職場烹飪班 – 豉椒炒魷

z33

警告 : 以下部份內容可能會令人出現噴飯 , 啃親 , 氣咳 , 標淚 , 爆嘴 , 甩肺等症狀 , 敬請特別留意。

身為管理層 , 面對全球一體化 Globalization 而衍生出來最常見的兩種病狀 : 廢柴化 Fat-chai-lization及白痴化 Bak-zee-lization 在辨公室病態學 Officepathology 中是最令管理人頭痛的。 兩種病毒以意式形態方法傳播 , 一經感染而不及早根治必引發其他嚴重拼發症 , 大大降低生產力 , 工作效益及士氣。

臨床實驗證明用 “隻眼開隻眼閉” 的自然療法 Nature Cure 是不能將病毒有效控制及治療的。 最近兩份權威雜誌醫學界的 “刺青” 及人事管理界 – “插背” 同時就這病狀問題發表了相關報告 , 指出目前最有效的 “斷根療法” Radical Treatment 就是傳統中菜烹飪 Cross Over 人事管理智慧的 豉椒炒魷

而小第有幸曾參與 “麻省理工大學深水埗支校” 與  ”北京不自然人類研究所” , 共同協辦的專題課程中 , 學到這項治療技術 , 而今日就想同大家分享一吓:

材料揀選方面最好要用揀手 “死有餘菇()” 一類材料包括:

材料 A – 卸膊、吞泡、蛇王、摶大霧 , 以下犯上 , 冇大冇細 , 功高蓋主 …………. 材料要預先整定 ,  浸水發大 , 保鮮備用。

材料 B – 推莊 , 懶散 , 遲到 , 早退 , 無瓣掂 , 玩辨公室政冶手段 …………. 材料就要洗淨 , 用”心機一擔”養到肥肥大大備用。

材料 C – 扮蟹 , 炸死 , 樣哀 , 口嗅 , 搬弄是非 …………… 則原件免切作伴碟留用。

另外”死貓” , “老屈” , “砌生豬肉” 呢幾味材料 , 因為容易 過火 、 黐鑊及易燶 , 好易做哀自己個”朵” 建議最好不用。

調味料醬汁方面:

沙膽一個 , 夠薑多多 , 厚顏一樽 , 心機一擔 , 口水成籮 , 溫油(柔)二匙 , 溫鹽(言)少許 , 即酒() 隨量 ,  實Q (Security)留用。

器材方面:

煮食爐 Gas 最好唔好用”勞氣” 或”谷氣” , 而用”正氣” 。

火路要一定要夠猛 , 最好有 ”把幾火”  或 ”無名火” , 能夠用到 ”佛都有火” 就更佳。

“鑊" 是全個 Operation 最關鍵的 , 冇鑊就冇得炒 , 要暫時戒急用忍。若自己怕揹鑊改用"易潔鑊" 唸住"唔黐鑊易甩身”就不如唔好玩。  呢味菜一定要用傳統鑊 , 仲要越大越好 , 因為”爆大鑊” 先夠鑊氣 , 炒得夠甘香 , 香聞千里。

做法:

1.  用”正氣”加”把幾火”將隻鑊燒紅 , 將”溫油(柔)” 落鑊 ,燒到出少少煙增加氣氛更好 ;

2. 將”死有餘菇()” 材料 A 放入鑊內走油 , 加大至”無名火” , 煮到材料面青口唇白 , 標晒冷汗 ;

3. 加入材料 B 及C , 再加大用 “佛都有火” 炒香 ; 

4. 此時材料會出現 “死雞撐飯蓋” 現像 , 可加”溫油(柔)” , 小量”溫鹽(言)” 或用 “口水成蘿” 浸佢幾分鐘 ;

5. 之後再用”厚顏” 加 “即酒()” 打芡 , 材料炒至乾身 ;

6. 鐘意食辣的可加少少”手辣” , 但記住千祈唔好用 “毒辣” 因為會損 “正氣””;

7. 要煮得好呢味”良心”要收埋而一定要用少少 “狠心”; 唔慣可楂少許 “厚顏” 幫手 ;

8. 功多藝熟炒吓炒吓就慣 , 如有難題可叫 “實Q ” 在旁協助 , 敬送 A4 紙箱 , 再私人醒多兩滴 “攔施拮露” , 然後揾專車送埋佢去 “波斯仆(富)街” 又點話 …………… 咁呢味香噴噴 “豉椒炒魷” 完成啦

9. 完成後記得 “擺佢上枱” , 同所有病患者分享選料心得 , Make Sure 佢”背脊骨落” , 咁就 Very Good 啦。

此仍四季家常菜 , “死有餘菇()”材料選擇彈性好大 , 只要啱 Feel , 啱 Mood 就可以自由組合 , 隨時”開鑊” 。

而年近歲晚更可加入”殺雞” , “擏猴” 兩味作增慶菜式 , 效果更佳 , 最緊要係炒得開心、冇手尾跟就得。 炒完包保通體舒暢 , 精力百倍。

若大家對這份食療有興趣的話歡迎引用、分享、討論及傳閱 , 更可在公司飯堂將炒魷記錄 , 以類似最佳員工方式公告 , 宏揚教化 , 做福蒼生。

今次時間又到 , 下次再有機會同大家分享其他職場烹飪心得。

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s