好多人都會問我怎樣去學酒 , 如果我告訴你 2004 年前的我滴酒不沾 , 你們會相信嗎 ? 我學酒一為工作 , 二為興趣。自己不想太隨意以人飲我飲 , 人云亦云的方式去學 , 在多年心願而工作時間又許可下於是報讀 WSET 課程, 由初級讀到 Advance 。WSET 的課程真的很有係統 , 但理論始終歸理論 , 實際歸實際 , 有時真的不易去掌握 , 老實講對於一個平時不飲酒而又無經驗的我 , 真的丈八金剛 , 摸不頭腦 , 加倍困難 ……….所以讀完 Advance 後就決心由基本功由頭再學 , 纍積經驗 ,  這是學酒必經之路 , 當然學習進度各人不同 , 對葡蔔酒的要求亦因人而異 , 最重要是問清楚自己想達到那個水平 , 玩物養志 , 樂在其中。

以下有十多點心得希望同大家分享一:

1) 組隊 – 學葡萄酒最好先組隊 , 先從一大班人中找些志同道合、唔怕蝕底、功力相若 , 有熱誠的 “道友” 一齊玩 , 個班長做領導 , 大家分擔工作 , 收料 , 地方 , 定主題 , 酒 , 會計 , 各司其職。

2)  基本法 – “練武不練功 , 到老一場空”  我極之建議由基本功練 , 訓練味覺、嗅覺。自己曾花千幾元買了些所謂 tasting kit , 大家千祈唔好錢。 你走去生店買生果 , 香料類去 super market 買一堆香草 , 香枓 , 自己係屋企又嗅又食 , 印象仲深 。 有心的去 “莎莎” 買些樽仔 , 幾個酒友一齊做幾 set , 實惠又實際。 味覺方面可以食生果試唔同酸度 , Body 可用水 , 脫脂奶 , 全脂奶 , 不同比例混合去體會分別 , 單寧則用茶葉浸一段時間苦澀 , 亦可用水溝淡來試來體會 。可以的話食清淡如沙律、青菜 , 試一排好自然你會建立一套味覺 data base。玩深可以玩 Blind taste , 將一兩樣生果切少少一同放在紙杯中蒙眼去估 , 睇估中幾多 , 好玩又練到功力。

3) 定立目標 – 例如先由單一葡萄玩如 chardonnay, riesling, pinot noir, shiraz……. 在 hot and cold environment 環境 或 New world & old world 都有不同的表現。遂隻試 , 找相同 ,  找分別 …………… 在我的 Blog 內有幾篇同類文章可供參考。

4) 寫 tasting notes – 這是非常重要的一環 , 坊間有些已有格式用來影印就可以 ,  慢慢寫 , 遂樣寫 , 可以的話越詳細越好 , 大家一齊試一齊寫 , 寫完大家分享交流 , 唔好怕醜 。 如有經驗飲家帶領會更好。

5) 做 Blind Tasting – 試玩 , 就算俾你知道邊支打邊支 , 你又分唔分得出? 你的 tasting note 會幫到你 。

6) 每次 gathering 最好有 theme , 飲得來又學到。 酒的種類唔好多(可以的話每次唔好多過 6 款) , 人多的話就每款買多一支或幾支 , 俾多時間支酒去表達 。想開心狂歡 “柴娃娃飲到趴” 另計。

7)  有目的地出席試酒會 – 大型試酒會時是試 (3) 的最佳時機。Food & Wine pairing dinner 就要揀些由經驗搞手搞的聚會 , 唔會有太靚酒你飲 , 但 food & wine matching 是另一大學習主題 , 非常值得去。

8) 學處理 – 什麼是最佳度 ? 支酒要 air 幾耐? 好多時聽人講酒唔好飲 , 大多數因為處理不當引 , 經常犯的毛病是酒太多 , 車輪戰或大混戰 , 酒未 ready 就被判生死 ……….. 真係見到都肉痛 。大家會發覺我的 tasting notes 寫得好詳細清楚 , 有點似實驗報告 ………..幾點開 , 幾點過 decanter , 幾點落杯 , 幾點玩完 ……..就因為想詳細記錄作將來參考 , 我都想知如果將酒表現最佳狀況。

9) 玩 Vertical tasting – 試相同酒莊 “好年份、一般年份、差年份 “在酒風格上的表現 ; 試 新酒、熟酒的分別。特別留意 酸度、Body , 濃淡 , aftertaste 每項的不同分別。

10) 馬拉松式品酒 – 個要獨留家中煲劇或唔想出街的日子 , 去開支較靚酒 , 由開酒瓶一巧開始每半小時或一小時 , 去記錄一次酒的變化 , 你會發覺對酒有更深的了解及體會 , 我第一篇上誌筆記 – 馴悍記 , 足足玩了 72 小時 , 但亦是一次極寶貴的經驗。

11) ”熟酒”體驗  – 飲到咁上去搵支 70s, 80s年代一般年份法國  二、三級酒莊試 ,  領略一熟酒的美態 , 增加經驗。

12) 名酒体驗 – 功力有番咁上就試所謂 “名酒” , 增加經驗。個人並不太主張名牌效應 , 因真的太貴及不太值得 , 其實好多中價酒都好好飲 , 名酒貴幾倍至幾十倍 , 但一定唔會好飲幾倍。如果上述 11 點都未搞清楚就無謂錢 , 當然有大豪客請又另計 , 畢境搵錢艱難 。

13) 玩地區特性如 Bordeaux , Burgundy, Rhone, Italy 內每個細產區地域特性 , 最好同年份。

14)  玩老樹葡萄 , 玩土壤分類的酒特性。

上述 14 點應該可以玩到 80 歲  , 老實講 “酒海無崖 , 唯窮是岸” 越學越自覺渺少 , 我都有好多唔識 , 從呻 我只係 “導遊” 唔係 “師傅” 。